香港巴士論壇

21 Dec 2014：放左入精華咁耐，就算已經冇人睇我都應該update一下。

老老實實，我已經有好多年唔係「正規」巴迷，冇再去影車，專登研究部車既spec，但係因為近年經常搭車，所以轉為去研究坐過既車型個內籠，到底邊D係用黎裝客，邊D係用黎逼沙甸魚，當中仲見唔少蠢到冇野好講既design，既然都見到咁多，咁我唔爭係到分享下。注意客車規格 (e.g. 龍運/城巴客車版Trident、NLB MAN旅遊巴) 車種並不包括在內。

利益申報：本人身高185cm以上，對腳話咁易就會頂住前面張凳，研究亦以上層為主

AD - Dennis Dragon 11m A/C (3+2) (G牌) (2014修改註：已全退)
短評：標準沙甸魚
好老實咁講，呢批車十幾年車齡，好多野都冇乜好期待，但其實相對於90年代中既2+2車，都仲有少少驚喜—上層右梯後果堆兩人座椅既前後距離非常長，就算係小弟坐落去都有空間剩。除此之外，呢批車真係冇乜優點可以提。除左我講果堆兩人凳之外，凳同凳之間既距離唔長，加上張凳本身已經窄，繁時或者多人既路線真係見住D人慘變沙甸魚。大約五六年前3+2 AD既冷氣可以話係全九巴之冠，但係近呢幾年真係虧到冇朋友，風口甚至聞到冷氣有陣味……

AD/3AD - Dennis Dragon 11m/12m A/C (2+2)
短評：最佳白板
唔好話我賣花讚花香，我認為呢批車真係值呢個評語。首先，作為一架冷馬，最優先既真係部死人冷氣，而以目前狀況黎講，3AD既冷氣絕對可以稱得上白板之最，甚至連ATR/3ASV好多時都唔夠3AD凍。其次，座椅編排上相對於Alexander RH/ALX500車身既車型寬鬆，加上已經改配高身版Lazzerini凳，比我呢D偏高既人坐都唔會辛苦得去邊。缺點在於上層右邊窗邊位既地台幾乎永遠有野頂住你，呢個情況係車尾位更加係離晒大譜。

要再仔細咁比較嘅話，2+2 AD其實比3AD更優勝。上層樓梯前果幾排凳腳位極闊不在話下，部車本身嘅避震亦比3AD好好多。

AV/3AV - Volvo Olympian 11/12m A/C (3+2) (2014修改註：已全退)
短評：進階沙甸魚
拿，一樣係3+2車，AV/3AV上層堆凳排得比AD更加密，3AV更加差不多密到唔駛坐人咁濟。不過相對於AD，冷氣一般冇任何怪味 (雖然好多時都係偏弱)。而且3+2 AV/3AV上層車尾果一排闊凳係我坐過所有現役九記車入面最好坐既凳。點解好坐？果一排凳既坐墊個傾角相當大，結果就係一張承托力一流既極品

AV/3AV - Volvo Olympian 11/12m A/C (2+2)
短評：經驗不足
可能因為九記開始買2+2雙層車無耐，所以好老實咁講句，呢批車上層坐位佈置真係好唔得……為左谷果少少載客量，將堆凳擺得近都算，仲要放到鬼死咁矮，對唔住，我坐直個頭就懸空，坐低D對腳頂住前面……而且3+2版最正既後排承托力不再，變左做同其他2+2車 (ALX500車身以外) 一樣既偏平放設計。

同3+2時代一樣，3AV上層腳位不足嘅情況比AV更嚴重，高少少嘅都係睇下樓下車尾或者橫位有冇位吧啦

不過講到尾，呢批車最大問題係部冷氣。D10A版出風口設計差都算，而家批車既冷氣好多都虧到喊，我完全唔明點解呢批車既冷氣可以比3+2 Olympian虧得更快……


ATR/3ASV Dennis Trident/Volvo Super Olympian 12m A/C (ALX500) (Lazzerini闊凳)
短評：時代倒退？
作為九巴當年大力宣傳既第一款低地台車種，我對ALX500 Trident係失望既。之前我都提過，Volvo Olympian 2+2可能係經驗不足，導至座椅編排不理想，但Trident/Super Olympian作為九十年代末既全新車型，我絕對要狠批……上層凳同凳之間既距離比2+2 3AV更短，最後排坐墊完全平放，仲要擺明係想一個剎車就搞到你仆落地果種。唯一勉回劣勢既就係張Lazzerini凳同3AD一樣係高身版，高既人坐直叫做勉勉強強夠坐。

早期ATR比較特別嘅係，下層最後排並唔係對頭位，因此整個後排嘅腳位都比較充足。

冷氣方面，Trident/Super Olympian上層既冷氣有一定保証，唔會好似Olympian咁十架有七架虧。

ATR/3ASV Dennis Trident/Volvo Super Olympian 12m A/C (ALX500) (Lazzerini窄凳)
短評：趕客王
是咁的，小弟有兩次不幸坐中窄凳版ALX500，整個設計只能用完全失敗黎形容。繼承晒闊凳版既全數缺點，再加上用窄凳，我絕對我有理由相信我只係上左一架冇左神級尾排凳既3+2 3AV 一般黎講我係唔會因為架車張凳好唔好坐而決定上唔上車，但係下次再比我見到呢批當乘客係垃圾既車而又唔係趕時間，我絕對會考慮等多班或者改乘其他交通工具

冷氣大致上同闊凳版一樣有一定保証，不過整D咁正既內籠比我嘆，我都係去逼地鐵好過

3ASV - Volvo Super Olympian 12m A/C (ALX500) (Fainsa Cosmic)
短評：爭番淡氣
ALX500車身中只此一批，用同B.Man一樣既Fainsa Cosmic凳既3ASV，係本人唯一比較滿意既ALX500車型。雖然堆凳都係放得太近，但係起碼Fainsa Cosmic凳放得夠高，算係保得到獲。(雖然Fainsa凳個頭枕我到而家都唔係好滿意)

ATR - Dennis Trident 12m A/C (Duple Metsec)
短評：DM最後的絕響
上面講完差強人意既ALX500，咁成為Duple Metsec係香港最後一作既DM Trident又點呢？答：好過ALX500好多！凳同凳之間既距離相當足夠，尾排亦唔係ALX500既「冼死你」設計，總算正正常常，相當舒適。

不足之處在於最左尾批之外冷氣槽設計不良，出風效果唔算太好，但普遍黎講係部車都係夠凍既。上層尾排窗口位不設頭枕，亦比大部份其他低地台車失色。

Duple Metsec係2002年正式收檔，我個人覺得係一件好可惜既事。

AMN - MAN 24.310 12m A/C (Berkhof)
短評：真正新世代內籠規格
其實大家都知，呢批車真係城記規格加個頭枕就算數，但係諷刺既係，呢批車當時正正成為九記規格最前衛既車型。因為採用位置相對高既Fainsa Cosmic凳，加上兩排之間相當充足既空間，無論你高矮肥瘦都坐得好，而且車窗位置偏低，睇景簡直一流。

不過就如上面Fainsa凳3ASV一欄所提到，本人對Fainsa凳頭枕略感不滿意，算係呢批車最大嘅遺憾。

AMN - MAN 24.310 12m A/C (Volgren, AMN34,35)
短評：梳化！
呢兩架車係九記唯獨兩架用Transit Seating凳既車 (同B.Man既Fainsa Comic一樣係城記遺物)，唔好睇九記整果堆椅套做工咁求奇就以為係廢野，呢隻凳既坐墊同椅背都係非常軟身，極之好坐。我坐過一次已經食過番尋味

腳位

AMN MAN 24.310/Volvo Super Olympian/B9TL 12m A/C (Volgren)
短評：還我Transit Seating！
AMN34,35以外嘅Volgren MAN改用左Vogelsitze凳。呢批Volgelsitze凳只可以用「勁硬」黎形容，

AP - Neoplan Centroliner N4026/3 & N4426 12m A/C, NeoMan A34 12m A/C
短評：除左車頭塊玻璃大之外，你仲有咩先？
上層除左樓梯前果一排之外，腳位普遍不足；上下層尾排全數不設頭枕。Um......其實除左上層擋風玻璃夠晒大塊，同冷氣普遍夠勁之外，我都唔知有乜可以讚呢款車。

ATE/AVBE - Alexander Dennis Enviro 500 12m A/C & Volvo B9TL 12m A/C (Enviro 500)
短評：Alexander大翻身
老實講句，前兩代既Alexander車身 (RH, ALX) 既車廂編排真係強差人意，不過E500雖然只係將舊設計加大，但已經比ALX500好左好多。不論係凳同凳之間既距離、尾排坐墊安排同埋Lazzerini凳既椅背高度都比ALX500改善不少。雖然呢批車已經開始慢慢老化，不過冷氣力水依然強勁 (雖然唔知可唔可以同3AD一樣keep到咁耐)。

AVW/AVBW - Volvo Super Olympian/B9TL 12m A/C (Wright Explorer)
短評：新世代雪櫃
同Enviro 500幾乎同期既Wright Explorer車身，始終都係好過Alexander野……冷氣黎講用Wright Explorer車身既Volvo普遍比E500更強，已經去到坐爆都可以變雪櫃既地步，只差在冇以前F牌AD咁坐爆人都凍到個窗積水咁恐佈。另外，凳同凳之間既距離似乎比E500略長。

AVBWU - Volvo B9TL 12m A/C (Wright Eclipse Gemini 2) (AVBWU1-290)
短評：你肯定呢批唔係客車？
上層樓梯後幾乎係前所未有嘅闊腳位，強勁嘅冷氣，其實呢批車唔係比龍運行機場線我覺得真係走寶。雖然就點都冇可能同Cityflyer比架啦，不過以現役市區規格車種黎講，呢批AVBWU要稱王根本輕而易舉。

ATENU - Alexander Dennis Enviro 500 MMC
短評：中規中矩，可以接受
新一代嘅高載型車種，為左提高載客量而開始逆流減上層腳位，變相乘坐感比以前任何直梯車都要差。不過張凳設計唔錯，擺位亦較為高，而一定程度上抵消咗腳位收窄嘅影響。雖然我坐落去都係有少少頂，不過相對於ALX500黎講仍然好坐得多。

AVBWU - Volvo B9TL 12m A/C (Wright Eclipse Gemini 2) (AVBWU291)
短評：2+2 3AV再世，沙甸魚2.0
同綠牌蛋有如天堂地獄之別嘅橙牌蛋，上層除左尾排中間位，無論我試圖坐邊到都係頂腳頂到落番樓下。如果你身高過人，都係唔好上去為秒。

==========================================================================================
拿，上面果堆野我就真係靠親身搭黎講既啫，冇用把尺去度，更冇用過溫度計，如果你手上既stat同我講既唔match，或者你見到我喪鬧/喪讚某款車唔開心既，歡迎狠評。我打出黎都係想吸引大家討論下，唔好下下都係到講邊部車快邊部車慢，呢D點講都係載客車黎，舒適度先係第一。

白板車之中3AD真係極品喎...Chok到呀媽都唔認得...
不過如果你話齋座唔計架行車既話,3AD又唔差既,但係講舒適度唔係應該計埋行車咩...?
白板黎講水塘豪行車表現最定的鳥...

GK9141@93A :白板車之中3AD真係極品喎...Chok到呀媽都唔認得...
不過如果你話齋座唔計架行車既話,3AD又唔差既,但係講舒適度唔係應該計埋行車咩...?
白板黎講水塘豪行車表現最定的鳥...

死，真係唔記得左寫番3AD chok到九彩呢個事實

行車表現穩定係好，可惜水塘豪冷氣真係虧得好緊要，我搭過好幾部幾乎係開左等於冇開的

咁多款九巴坐過入面，真正覺得最舒服都係MK117/217J，本身張一排過嘅凳已經好似梳化，而尾牌太平門之前個空位更加可以盡情伸腳！正！

新款E200 Dart相對之下D凳就好唔掂....後期版D凳加返厚椅墊先好坐返少少，但腳位其實都唔係好夠

Sholong :咁多款九巴坐過入面，真正覺得最舒服都係MK117/217J，本身張一排過嘅凳已經好似梳化，而尾牌太平門之前個空位更加可以盡情伸腳！正！

新款E200 Dart相對之下D凳就好唔掂....後期版D凳加返厚椅墊先好坐返少少，但腳位其實都唔係好夠

批三菱真係到佢地退都無緣搭，所以對於我黎講AMN34,35已經係最高享受……

至於腳位唔夠，真係雙層車下層/非旅遊巴型單層既通病黎，基本上係絕症。我批到部分雙層一文不值就係因為果堆車連上層都夠膽玩呢套

我只矮你1cm...
所以我都幾同意你講ge o野，特別係呢幾段：

CNR4806 :Volvo Olympian 11/12m A/C (2+2)：★☆ 短評：經驗不足
可能因為九記開始買2+2雙層車無耐，所以好老實咁講句，呢批車上層坐位佈置真係好唔得……為左谷果少少載客量，將堆凳擺得近都算，用既係矮版Lazzerini凳，仲要放到鬼死咁矮，對唔住，我坐直個頭就懸空，坐低D對腳頂住前面……而且3+2版最正既後排承托力不再，變左做同其他2+2車 (ALX500車身以外) 一樣既偏平放設計。點解會比3+2 AD更低分？原因係部冷氣……出風口設計差都算，而家批車既冷氣好多都虧到喊，我完全唔明點解呢批車既冷氣可以比3+2 Olympian虧得更快……
*冷知識：2+2 AV上層尾二果排凳既凳背同樓梯前一樣係比較直身既，呢個安排我未係其他車型見過

Dennis Trident/Volvo Super Olympian 12m A/C (ALX500) (Lazzerini闊凳)：★★☆ 短評：時代倒退？
作為九巴當年大力宣傳既第一款低地台車種，我對ALX500 Trident係失望既。之前我都提過，Volvo Olympian 2+2可能係經驗不足，導至座椅編排不理想，但Trident/Super Olympian作為九十年代末既全新車型，我絕對要狠批……上層凳同凳之間既距離比2+2 3AV更短，最後排坐墊完全平放，仲要擺明係想一個剎車就搞到你仆落地果種。唯一勉回劣勢既就係張Lazzerini凳同3AD一樣係高身版，高既人坐直叫做勉勉強強夠坐。另外之前提過，Trident/Super Olympian既冷氣有一定保証，唔會好似Olympian咁十架有七架虧。

Dennis Trident/Volvo Super Olympian 12m A/C (ALX500) (Lazzerini窄凳)：☆ 短評：趕客王
是咁的，小弟有兩次不幸坐中窄凳版ALX500，整個設計只能用完全失敗黎形容。繼承晒闊凳版既全數缺點，再加上用窄凳，我絕對我有理由相信我只係上左一架冇左神級尾排凳既3+2 3AV 一般黎講我係唔會因為架車張凳好唔好坐而決定上唔上車，但係下次再比我見到呢批當乘客係垃圾既車而又唔係趕時間，我絕對會考慮等多班或者改乘其他交通工具
呀，你問我果半分係邊到黎？講左好多次，冷氣囉！不過整D咁正既內籠比我嘆，我都係去逼地鐵好過，起碼有半價

仲有Vogelsitze個頭枕位真係...上到呢D車我寧願企 (就算有位坐都好)

惟一唔同意ge係金車冷氣唔一定好，我搭過無數次ATR/3ASV都有上車前出哂汗，落車之前都仲係有汗ge情況出現
仲有舊年某次搭AVW，上車前冇汗，愈坐愈多汗，伸心探下個風口，嘩冇o野呀...出暖風？出面廿幾三十度喎大佬...

講冷氣我最buy E牌AD，惟一一次搭完可以令我傷風，連出名冷氣勁ge AL1都做唔到

竟然沒有說H牌那批2+2 AD....11米車中,只有這款車上層採用13排座椅,而非一般11米的14排..可能有人說是沒有位置放,但在乘客角度,跟前排闊點會更舒適...
同一問題:2+2AV上層尾排跟前排距離會否太大?為了隻窗而把其餘13排座椅之間的空間降低!?
B.MAN椅到現在也不明有何好坐....座椅的形態是gd,但軟墊太簿是最大缺點~個人坐後感是像坐膠椅....如跟著座椅形態來坐完全不成

巴士狂徒 :惟一唔同意ge係金車冷氣唔一定好，我搭過無數次ATR/3ASV都有上車前出哂汗，落車之前都仲係有汗ge情況出現
仲有舊年某次搭AVW，上車前冇汗，愈坐愈多汗，伸心探下個風口，嘩冇o野呀...出暖風？出面廿幾三十度喎大佬...

講冷氣我最buy E牌AD，惟一一次搭完可以令我傷風，連出名冷氣勁ge AL1都做唔到

我講緊既係整體上金車冷氣會比較正常。個別幾架車壞冷氣我都試過，B.MAN幾乎冇冷氣，2+2 AV直情成部冷氣唔work要係屯公停埋一邊轉車

PS.我最近同呀媽講開66x新上掛果幾架AVBWU冷氣幾正，佢話有一架冷氣有死氣味

愛麗絲公主 :竟然沒有說H牌那批2+2 AD....11米車中,只有這款車上層採用13排座椅,而非一般11米的14排..可能有人說是沒有位置放,但在乘客角度,跟前排闊點會更舒適...
同一問題:2+2AV上層尾排跟前排距離會否太大?為了隻窗而把其餘13排座椅之間的空間降低!?
B.MAN椅到現在也不明有何好坐....座椅的形態是gd,但軟墊太簿是最大缺點~個人坐後感是像坐膠椅....如跟著座椅形態來坐完全不成

因為實在太少坐，為免亂up講錯野就skip晒2+2 AD、ADS之類甚少會坐既車型

2+2 AV尾排確實空間過剩，而且竟然仲將尾二果排個椅背拉直黎製造更多冇用既空間，呢樣的確係好奇怪既做法。
Fainsa Cosmic死穴係座墊太薄+太硬，但係肯將張凳放得高D呢樣我已經buy佢—就算要慳位將D凳貼得近D，起碼都整高張凳啦，2+2 AV果種Lazzerini擺法我真係要坐晒兩張凳先叫做夠位

CNR4806 :

愛麗絲公主 :竟然沒有說H牌那批2+2 AD....11米車中,只有這款車上層採用13排座椅,而非一般11米的14排..可能有人說是沒有位置放,但在乘客角度,跟前排闊點會更舒適...
同一問題:2+2AV上層尾排跟前排距離會否太大?為了隻窗而把其餘13排座椅之間的空間降低!?
B.MAN椅到現在也不明有何好坐....座椅的形態是gd,但軟墊太簿是最大缺點~個人坐後感是像坐膠椅....如跟著座椅形態來坐完全不成

因為實在太少坐，為免亂up講錯野就skip晒2+2 AD、ADS之類甚少會坐既車型

2+2 AV尾排確實空間過剩，而且竟然仲將尾二果排個椅背拉直黎製造更多冇用既空間，呢樣的確係好奇怪既做法。
Fainsa Cosmic死穴係座墊太薄+太硬，但係肯將張凳放得高D呢樣我已經buy佢—就算要慳位將D凳貼得近D，起碼都整高張凳啦，2+2 AV果種Lazzerini擺法我真係要坐晒兩張凳先叫做夠位

2+2 AD/ADS上層坐位距離好闊
一搭就愛上

ADS/AD/3AD下層對頭位係隻腳長人既死敵, AS就正哂

基本上我覺得都普車身的巴士好d，雖然內籠好平實，但勝在內籠兩邊側壁夠薄，令到佢內籠比ADL闊，唯一問題係只配Dennis底盤，避震減o左唔少分數，唔知ADL的底盤被震整到咁硬係未為o左載重同軑感而設？

不過坐窄櫈膠豬又真係好痛苦，試過坐一程968，側邊坐個女人都覺得好迫，真係唔明裝窄櫈的意義何在

依家我覺得最正的內籠反而係E200個籠

我都係鍾意S3BL同密龍，熱狗凳好軟熟，唔似九巴仔皮凳等好硬。而且S3BL同密龍上層車頭個窗對正個位，點講都大風過冷氣。
個人意見only

GZG50 :不過坐窄櫈膠豬又真係好痛苦，試過坐一程968，側邊坐個女人都覺得好迫，真係唔明裝窄櫈的意義何在

我相信用窄凳既原意係想條通道闊D，不過：
1. 上層又唔企得人，整闊佢做乜先，本身條通道又唔係好似城記客車版DM Trident咁窄……
2. 我真係唔覺條通道闊左好多，反而張凳就真係窄到喊……

我反而覺得V凳好坐....至少夠兜
(我大約17x左右啦)

TobuMinamiKurihashiRailwaySta. :我反而覺得V凳好坐....至少夠兜
(我大約17x左右啦)

V凳我都認同佢個凳背兜得唔錯，但係問題在於個頭枕唔夠厚，個人一高少少，頭枕頂就好似一塊板既板邊頂住個後尾枕，超唔舒服
反而L凳果個頭枕又夠圓滑又夠厚，俟落去感覺良好

同埋想回一回樓主起初喺一樓果個短評

其實以Wright 車身黎計，B10TL同B9TL個下層layout係有少少唔同，故此其實不能夠相提並論
B10TL果隻explorer既直梯相比B9TL果隻eclipse gemini (2)係略長(可以比較下下層右邊樓梯之後第一隻窗既size)
於是explorer下層樓梯後面果三排向前既位就排得密過eclipse gemini (2)，同埋上層樓梯後面果排凳係闊落少少，唔知樓主有冇發現到

仲有一點係，B10TL本身係發展自olympian，於是承繼左olympian既加厚側架
但B9TL本身由B7TL發展出，而B7TL設計上同olympian基本冇乜關係，B7同B9根本就冇olympian果隻厚身側架
於是B10TL中軸同尾軸上面果d位，窗口下面都有一pat野凸左出黎，反而B9同樣位置果pat野就薄得多
故此為保持走廊闊度，B10TL中軸同尾軸上面既位全部都係窄凳，反而B9喺同一樣既位置可以裝到闊凳
所以12米直梯黎計，得AVW喺果個位係用窄凳，其他同樣長度既直梯車喺果個位都係用闊凳

所以其實樓主可以喺下層再感受一下，話唔定會有少許唔同既睇法
btw，我對樓主既短評實在非常欣賞，因為呢d對內籠既系統性意見都幾少見